Францішак прызначыў новага нунцыя ў Беларусі

Папа Францішак прызначыў новым Апостальскім нунцыем у Беларусі ксяндза Габара Пінтэра, надаючы яму адначасова годнасьць арцыбіскупа.
Новы дыпляматычны прадстаўнік Папы рымскага ў Беларусі нарадзіўся ў Вугоршчыне ў 1964 годзе. Атрымаў сьвятарскае пасьвячэньне ў 1988 годзе. Пачаў службу ў ватыканскай дыпляматыі ў 1996 годзе, працуючы у дыпляматычных прадстаўніцтвах Ватыкану на Гаіці, у Балівіі, Швэцыі, Францыі, на Філіпінах і ў Аўстрыі.

Новы Апостальскі нунцый у Беларусі валодае вугорскай, італьянскай, ангельскай, нямецкай, гішпанскай, францускай, расейскай, швэдзкай і крэольскай мовамі.
Габар Пінтэр зьмяніў на пасадзе Апостальскага нунцыя ў Беларусі арцыбіскупа Кляўдыё Гуджэроцьці. У лістападзе 2015 года Францішак прызначыў італьянскага іерарха Апостальскім нунцыем ва Ўкраіне. Ён выконваў дыпляматычную місію ў Беларусі на працягу чатырох з паловай гадоў.

паводле Ватыканскага радыё/вс