На Піншчыне ўстановяць помнік амэрыканскай дасьледчыцы Палесься

У Пінскім раёне плянуецца ўстанавіць помнік дасьледчыцы Палесься амэрыканцы Луізе Арнэр Бойд. Гэты помнік — частка турыстычнага праекту, прысьвечанага падарожжу дасьледчыцы на Палесьсе ў 1934 годзе.

Бліжэйшай вясной пінскія ўлады плянуюць устанавіць таксама памятны знак у вёсцы Пінкавічы каля музэя Якуба Коласа. Паводле задумы, на ім будзе паказаная карта маршруту, па якім Луіза Арнэр Бойд падарожнічала па пінскім Палесьсі. Эскіз скульптуры ўжо распрацаваны.

Сёлета згодна з праектам таксама выдадзены фотаальбом "Палесьсе Луізы Бойд" і зьняты дакумэнтальны фільм з такой жа назвай. Спэцыялісты распрацавалі аўтамабільны й веламаршрут. Турыстам прапануюць наведаць тыя ж месцы, дзе ў свой час пабывала легендарная дасьледчыца.

Луіза Арнэр Бойд у 1934 годзе пабывала з экспэдыцыяй на Палесьсі. Яна зрабіла больш за 700 фотаздымкаў рэк, азёр, балот, людзей. Цяпер гэтыя здымкі зьяўляюцца каштоўнымі гісторыка-этнаграфічнымі дакумэнтамі.

белта/эўрарадыё/вс