Статкевіч заклікае на акцыю памяці

Былы кандыдат на прэзыдэнта Беларусі Мікалай Статкевіч заўтра ладзіць новую вулічную акцыю, прымеркаваную да гадавіны «рэфэрэндуму» 1996 года. У Фэйсбуку палітык напісаў, што ў выніку рэфэрэндуму Лукашэнка прысвоіў сабе дыктатарскія паўнамоцтвы, што можна расцэньваць як канстытуцыйны пераварот. Перад галасаваньнем, каб аслабіць супраціў, быў зьняты з пасады міністар унутраных спраў Юры Захаранка, пазьней пазбаўлены пасады старшыня Цэнтрвыбаркама Віктар Ганчар. У 1999 яны былі выкрадзены і забіты.

«У чарговую гадавіну дыктатуры ў нашай краіне мы ўшануем памяць тых, хто ахвяраваў жыцьцём дзеля свабоды Беларусі, – напісаў Статкевіч. – Мы ня ведаем, дзе яны пахаваныя, таму мы прыйдзем туды, дзе яны працавалі – да будынкаў МУС і ЦВК, каб запаліць сьвечкі памяці аб забітых.»

Пачатак акцыі – а 18.00 у аўторак, збор каля ГУМа.

Хартыя’97/нг