Найбольш заявак на сустрэчы з выбаршчыкамі падалі ад Караткевіч

Больш за ўсё заявак на сустрэчы з выбаршчыкамі падчас агітацыйнай кампаніі падалі давераныя асобы Тацьцяны Караткевіч, паведаміла старшыня Цэнтрвыбаркама Лідзія Ярмошына падчас чарговага відэазвароту, які разьмешчаны на сайце vybory2015.by.

„Больш за 40 такіх заявак для сустрэч з выбаршчыкамі як на адкрытым паветры, так і ў закрытых памяшканьнях пададзена гэтым кандыдатам і яе даверанымі асобамі”, — сказала Ярмошына.

Яна таксама паведаміла, што 16 заявак на правядзеньне сустрэч, у асноўным у працоўных калектывах, пададзена ад давераных асоб кандыдата Аляксандра Лукашэнкі. Па чатыры заяўкі на сустрэчы з выбаршчыкамі падалі старшыня Беларускай патрыятычнай партыі, атаман Мікалай Улаховіч і старшыня Лібэральна-дэмакратычнай партыі Сяргей Гайдукевіч.

Ярмошына ўдакладніла, што на гэты момант ЦВК акрэдытаваў на прэзыдэнцкія выбары 385 міжнародных назіральнікаў, 264 зь якіх - гэта назіральнікі ад СНД.

belapan.com/аз