Мітынг з патрабаваньнем выдаць Бакіевых

У сталіцы Кіргізстану Бішкеку адбыўся мітынг з патрбаваньнем экстрадыцыі сям'і Бакіевых. Каля паўсотні мітынгоўцаў прыйшло пад беларускую амбасаду з патрабаваньнем выдаць Бакіевых ды іх набліжаных, якія знайшлі прытулак у Беларусі. Яны скандавалі «Сьмерць Бакіевым», «Жаныш Бакіеў – забойца!», «Беларусь, не прыкрывайце бандытаў!».

У Менску 19 лютага быў знойдзены забітым лідар арганізаванай злачыннай групоўкі Алманбет Анапіяеў. Як паведамляюць кіргіскія мэдыі, 24 лютага ў Бішкеку быў затрыманы Гулжыгіт Абілазізаў, які быў целаахоўнікам Анапіяева. Абілазізаў у паказаньнях паведаміў, што да забойства датычны сваяк зрынутага прэзыдэнта Кіргізстану Курманбека Бакіева, які цяпер жыве ў Беларусі, — Жаныш Бакіеў.

Былы прэзыдэнт Кіргізстану Курманбек Бакіеў атрымаў палітычны прытулак у Беларусі, улады Кіргізстану дамагаюцца яго выдачы. У Менску бачылі і брата экс-прэзыдэнта Жаныша Бакіева.

Паводле Радыё Свабода/нг