Андрэа Рыгоні сустрэўся з прадстаўнікамі беларускіх праваабарончых арганізацый

Спэцдакладчык Камісіі па палітычных пытаньнях і дэмакратыі Парламенцкай асамблеі рады Эўропы Андрэа Рыгоні падчас візыту ў Беларусь 25 лютага сустрэўся з прадстаўнікамі Праваабарончага цэнтру “Вясна”, РПГА “БХК”, ГА “БАЖ” і Цэнтра прававой трансфармацыі Lawtrend.

Па словах намесьніка старшыні Праваабарончага цэнтру “Вясна” Валянціна Стэфановіча, які прымаў удзел у сустрэчы, была абмеркаваная сытуацыя з адменаю сьмяротнага пакараньня ў Беларусі і адзначана, што вялікага жаданьня ў кіраўніцтва краіны нешта зьмяніць не заўважаецца.

Не засталася па-за ўвагай Спэцдакладчыка ПАРЭ і тэма палітычных зьняволеных у Беларусі, а таксама сытуацыя са свабодай сродкаў масавай інфармацыі. Андрэа Рыгоні быў праінфармаваны пра захады беларускіх уладаў у дачыненьні да блякаваньня сайтаў у інтэрнэце.

Рыгоні паведаміў праваабаронцам, што пад час сустрэчы са старшынёй ЦВК Лідзіяй Ярмошынай абмяркоўвалася магчымасьць запрашэньня на прэзыдэнцкія выбары 2015 года місіі назіральнікаў Парлямэнцкай асамблеі рады Эўропы.

яс/spring96.org