Жонка Статкевіча: „Мікола просіць апазыцыю аб’яднацца!”

Марына Адамовіч сустракалася зь Міколам Статкевічам 17 сьнежня, ён перадаў зварот для лідараў апазыцыі.

„З нагоды выбараў (Статкевіча прапанавалі зрабіць адным з кандыдатаў) Мікола дзякуе за падтрымку. Кажа, што любая падтрымка, як бы яна ні была выказаная, у яго умовах вельмі важная. Як бы ні была выказаная... Але Мікола ўсё ж такі вельмі просіць апазыцыю аб’яднацца”, - расказвае Марына Адамовіч.

Мікола Статкевіч перадаў праз жонку свае прапановы лідарам апазыцыі. Іх плянуюць агучыць пасьля рэакцыі палітычных сілаў.

12 студзеня 2015 году ў Міколы Статкевіча завяршаецца трохгадовы тэрмін узмоцненых умоваў утрыманьня. Марына Адамовіч спадзяецца, што яны ня будуць працягнутыя.

Мікола Статкевіч быў адным з кандыдатаў у прэзыдэнты падчас выбараў 2010 году. У ноч з 19 на 20 сьнежня 2010 году ён быў арыштаваны й абвінавачаны ў арганізацыі масавых беспарадкаў. Суд прызнаў Статкевіча вінаватым і прысудзіў да 6 гадоў пазбаўленьня волі.

euroradio.fm/аз