Спэцдакладчык ААН: сытуацыя з правамі чалавека ў Беларусі істотна не зьмянілася

Спэцыяльны дакладчык ААН па Беларусі Міклаш Харашці 28 кастрычніка прадставіў свой даклад аб сытуацыі ў краіне ў рамках 69-й сэсіі Генасамблеі ААН.

Рада ААН па правах чалавека прызначыла Харашці спэцдакладчыкам па Беларусі ў 2012 годзе. Ён адзначыў, што ўважліва адсочваў сытуацыю з правамі чалавека ў Беларусі, і за апошні год яна істотна не зьмянілася.

Харашці адзначыў, што дзейнасьць грамадзянскай супольнасьці паралізуюць тры асноўныя фактары: дазвольны прынцып рэгістрацыі аб’яднаньняў і масавыя адмовы ў рэгістрацыі, крымінальная адказнасьць за дзейнасьць ад імя незарэгістраванай арганізацыі й яе фінансаваньне.

Паводле спэцдакладчыка, у Беларусі паўсюдна выкарыстоўваюцца пагрозы й папярэджаньні для запалохваньня праваабаронцаў, каб перашкодзіць іх дзейнасьці.

У якасьці станоўчых тэндэнцый Харашці назваў унясеньне паправак у заканадаўства аб грамадзкіх аб’яднаньнях і палітычных партыях, якія ўступілі ў сілу ў лютым 2014 году. А таксама вызваленьне па амністыі праваабаронцы Алеся Бяляцкага.

Харашці адзначыў, што так і ня змог пабываць у Беларусі. Ён выказаў надзею, што беларускія ўлады ўсё ж пагодзяцца зь ім супрацоўнічаць.

Прадстаўнік МЗС Беларусі падчас пасяджэньня заявіў, што „даклады аб сытуацыі ў Беларусі пішуцца спэцдакладчыкам пад дыктоўку з Брусэля” йі назваў гэта „спробай умяшаньня ва ўнутраныя справы”.

Паводле прадстаўніка Беларусі, з моманту заснаваньня мандата спэцдакладчыка ў 2012 годзе Беларусь папярэджвала, што яго дзейнасьць ня будзе аб’ектыўнай і непрадузятай.

Удзельнік дыскусіі ад Расеі назваў даклад „палітычна ангажаваным і аднабокім”.

У падтрымку даклада Харашці выступілі прамоўцы ад Канады, Швэйцарыі, Нарвэгіі.

spring96.org/аз