Двойчы судзяць за адно

Праваабаронцам стаў вядомы чарговы выпадак грубага перасьледу аднаго з сацыяльных актывістаў. 18 жніўня ў Менску быў затрыманы Раман Халілаў.

Ён вяртаўся пасьля працы ў свой інтэрнат БДУІРа (паколькі зьяўляецца студэнтам 5-га курса). Супрацоўнікі міліцыі, якія чакалі актывіста ў інтэрнаце, правялі вобшук у ягоным пакоі, знайшлі ўлёткі па тэме працоўнага руху, як арганізоўваць забастоўкі і іншага зьместу.

Акрамя ўлётак былі сканфіскаваныя кампутар і тэлефон актывіста, а яго адвезьлі ў РУУС Савецкага раёну. Там быў складзены стандартны пратакол за “дробнае хуліганства” і 19 жніўня суд “выпісаў” яму 10 сутак адміністратыўнага арышту.

Аднак пасьля адбыцця адміністратыўнага арышту Халілава ізноў запрасілі ў РУУС Савецкага раёна, дзе прад’явілі новы адміністратыўны пратакол “Выраб, распаўсюджваньне і (або) захоўваньне экстрэмісцкіх матэрыялаў”.

яс/spring96.org