Льготныя крэдыты для аплаты экстракарпаральнага апладненьня

Адпаведны ўказ 27 сьнежня падпісаў Аляксандар Лукашэнка.

Дакумэнтам прадугледжваецца выдзяленьне льготнага крэдыту жанчынам, якім аказваецца мэдыцынская дапамога ў выглядзе экстракарпаральнага апладненьня (ЭКА), у арганізацыях аховы здароўя краіны ўсіх форм уласнасьці.

Зараз у Беларусі штогод праводзіцца 1.700-2.000 працэдур ЭКА.

Льготныя крэдыты будуць выдзяляцца ААТ "ААБ Беларусбанк" у беларускіх рублях тэрмінам да пяці гадоў з выплатай працэнтаў за карыстаньне імі ў памеры 50% стаўкі рэфінансаваньня Нацыянальнага банку. Максымальная сума крэдыту — да 300 базавых велічыняў, устаноўленых на дату заключэньня крэдытнага дагавору.

Таксама ў адпаведнасьці з указам крэдытаатрымальніку пасьля нараджэньня дзіцяці (дзяцей) з прымяненьнем ЭКА, які зьяўляецца атрымальнікам (мужам атрымальніка) дапамогі па даглядзе за дзіцём ва ўзросьце да трох гадоў, на пэрыяд атрыманьня гэтай дапамогі даецца адтэрміноўка ў пагашэньні запазычанасьці па льготным крэдыце.

яс/БелаПАН