Былы палітвязень Аляксандар Малчанаў шпіталізаваны

Былы палітвязень Аляксандар Малчанаў шпіталізаваны, яму патрэбная дапамога. Яго паклалі ў Барысаўскую цэнтральную раённую лякарню. Пра гэта паведамляе БелаПАН са спасылкай на грамадзкую актывістку Юлію Сьцяпанаву.

Паводле яе словаў, сёньня хлопец зьвярнуўся да лекара. Аналіз крыві паказаў, што ўзровень гемаглабіну ў Малчанава складае 70 г/л. Маладога чалавека тэрмінова шпіталізавалі. Лекары падазраюць у яго язву і ўнутраны крывацёк, хутчэй за ўсё яму правядуць апэрацыю.

Малчанаў жыве ў Барысаве з бацькам-інвалідам, у яго няма сваякоў ці сяброў, якія маглі б дапамагчы. Трэба, каб у Барысаў прыехаў дарослы чалавек, які мог бы прывезьці Малчанаву ў шпіталь неабходныя рэчы й пагаварыць зь лекарамі, адзначыла Сьцяпанава. Акрамя таго, паводле яе словаў, Малчанаў знаходзіцца ў цяжкім матэрыяльным становішчы, бо за ім усталяваны прафіляктычны нагляд. Хлопец ня можа пераехаць у Менск, дзе можа ўладкавацца на працу.

эўрарадыё/вс