“Саўбелка” надрукавала “ліст Гайдукова ў ЦРУ”

Газэта "Советская Белоруссия", друкаваны орган Адміністрацыі прэзыдэнта, апублікавала матэрыял "Выхадзец з сябе", прысьвечаны справе Андрэя Гайдукова, які 1 ліпеня быў асуджаны за замах на наладжваньне супрацоўніцтва з замежнымі спэцслужбамі, паведамляе БелаПан.

У матэрыяле прыводзіцца поўны тэкст ліста, які Гайдукоў нібы накіроўваў у Цэнтральнае разьведвальнае ўпраўленьне (ЦРУ) ЗША.

Ліст утрымоўвае прапанову аб супрацоўніцтве, якое арганізацыя Гайдукова, то бок Саюз маладых інтэлектуалістаў, хоча наладзіць з ЦРУ. Гаворка ідзе пра "інфармацыйныя палітычныя акцыі", якія, як адзначаецца ў лісьце, на сёньняшні дзень "праводзяцца ў недастатковай колькасьці і ў асобна ўзятых рэгіёнах".

"Мы хочам атрымліваць Вашы кансультацыі, парады па гэтым пытаньні. У выпадку калі Вас зацікавіць наша дзейнасьць - фінансавую дапамогу для правядзеньня такіх акцый", — гаворыцца ў лісьце.

Публікацыя ў "Советской Белоруссии" падпісана Ігарам Доліным. Аўтар не паведамляе, якім чынам да яго трапіў тэкст ліста. Пры гэтым ён сьцьвярджае, што ліст быў перададзены Гайдуковым "дзесьці ў канцы мінулага года" праз "прыяцеля, які ехаў у Нямеччыну". Той павінен быў пераправіць яго "з–за мяжы адрасату".

Долін таксама абяцае "працяг гэтай унікальнай гісторыі" ў наступных нумарах газэты.

У прэс-службе Камітэта дзяржбясьпекі, які расьсьледаваў справу Гайдукова, БелаПАН заявілі, што знаёмыя з артыкулам у "СБ", аднак ніякіх лістоў прэс-служба не распаўсюджвала.

дг/БелаПан