Міліцыю выведуць са стадыёнаў

На беларускіх стадыёнах вырашылі замяніць міліцыянтаў сьцюардамі „дзеля камфорту гледачоў’. Пра гэта паведамляе прэс-служба Міністэрства ўнутраных спраў.

10 ліпеня ў офісе Беларускай фэдэрацыі футболу адбылася сустрэча яе старшыні Сяргея Румаса зь міністрам унутраных спраў Ігарам Шуневічам. Яны абмеркавалі пытаньні бясьпекі й камфорту гледачоў на стадыёнах падчас футбольных матчаў.

Цяпер адмысловая рабочая група зоймецца маніторынгам сытуацыі на стадыёнах. Яна й распрацуе „стратэгію ўзаемадзеяньня” паміж Беларускай фэдэрацыяй футболу й МУС пры правядзеньні матчаў, каб вывесьці міліцыю за межы чашы стадыёна.

Адносіны заўзятараў і супрацоўнікаў міліцыі на беларускіх стадыёнах у апошні час сур’ёзна абвастрыліся. Асабліва з фанатамі найбольш папулярных клюбаў: „Дынама Менск” і БАТЭ.

Заўзятары скардзяцца ў Фэдэрацыю футболу, між іншым, на частыя й адкрыта хамскія паводзінамі супрацоўнікаў АМАПу.

svaboda.org/аз