Іншаземцы ўсё часьцей палююць у Беларусі

За студзень—кастрычнік 2012 года былі арганізаваныя 372 паляўнічыя туры для замежных грамадзян, што прынесла 6,1 млрд. рублёў прыбытку. Гэта ў 2,17 разу больш, чым за аналягічны леташні пэрыяд, паведаміла прэс-служба Міністэрства лясной гаспадаркі.

Большая частка паляўнічых тураў прыпадае на восеньскі сезон, які якраз працягваецца. Асабліва папулярнае ў іншаземцаў паляваньне на дзіка, высакароднага аленя і лася. З такога туру можна павезьці з сабой трафеі: рогі лася і аленя, іклы кабана.

У Беларусь прыязджаюць паляваць турысты з Расеі, Нямеччыны, краін Балтыі, Гішпаніі, Італіі, Францыі ды Польшчы.

Грошы з тураў для замежных грамадзян складаюць траціну ўсяго прыбытку ад вядзеньня паляўнічай гаспадаркі ў Беларусі.

У сыстэме Міністэрства лясной гаспадаркі Беларусі функцыянуюць 79 лесапаляўнічых гаспадарак, якія валодаюць 83 паляўнічымі комплексамі.
БелаПАН/эб