Лукашэнка прызначыў новых кіраўнікоў "Камунаркі" і "Спартака"

Аляксандар Лукашэнка прызначыў новых кіраўнікоў кандытарскіх прадпрыемстваў "Камунарка" й "Спартак – паведамляе агенцтва БелаПАН.

12 кастрычніка Лукашэнка запатрабаваў ліквідаваць назіральныя рады фірмаў і адхіліць ад пасадаў іх дырэктараў. Таксама кіраўнік дзяржавы запатрабаваў звальненьня старшыні канцэрна “Белдзяржхарчпрам” Івана Данчанкі.

Данчанка быў пераведзены на пасаду дырэктара “Камунаркі”. На пасаду генеральнага дырэктара фабрыкі “Спартак” быў прызначаны Алег Жыдкоў, які раней быў кіраўніком справамі Гомельскага гарвыканкама. Абавязкі старшыні "Белдзяржхарчпрама" выконвае першы намесьнік старшыні канцэрна Генрых Чарняк.

Нагадаем, 12 кастрычніка на спэцыяльнай нарадзе Аляксандар Лукашэнка раскрытыкаваў сытуацыю ў кандытарскай галіне, загадаў ліквідаваць назіральныя рады на прыватных фабрыках “Спартак” і “Камунарка” й вярнуць прадпрыемствы дзяржаве. "На працягу кастрычніка закрыць праблему па ўсіх прадпрыемствах, якія калісьці былі прыватызаваныя, раздадзеныя й іншае. Усе яны павінны быць дзяржаўнымі прадпрыемствамі!" - заявіў кіраўнік дзяржавы.

БелаПАН/ап