Латвія ня будзе настойваць на адмене санкцыяў супраць Лукашэнкі

Фота: mk.gov.lv

Урад Латвіі не зьбіраецца лябаваць за адмену візавых санкцыяў супраць чыноўнікаў Лукашэнкі. Пра гэта ў інтэрвію Польскаму радыё паведаміў прэм’ер-міністар гэтай краіны Валдзіс Дамброўскіс. Ён адказаў на пытаньне пра стасунак латвійскага бізнэсу да санкцыяў ЭЗ супраць беларускіх уладаў.

В. Дамброўскіс: Як вы ведаеце, санкцыі Эўразьвязу былі падтрыманыя адзінагалосна. Гэта значыць, Латвія таксама іх падтрымала. Для нас важна, каб Эўразьвяз прытрымліваўся сваіх каштоўнасьцяў дэмакратыі й правоў чалавека. Караючы й скарачаючы кантакты з рэжымам, мы не павінны скарачаць кантакты зь беларускім народам. Мы лічым важным, каб Эўразьвяз разьвіваў кантакты паміж людзьмі, абмены, працу з грамадзянскай супольнасьцю ў Беларусі.

Пры гэтым латвійскі прэм’ер заявіў, што для яго краіны падтрымліваць бізнэс-кантакты зь Беларусьсю.

В. Дамброўскіс: Падтрымка эканамічных сувязяў зь Беларусьсю вельмі важная для разьвіцьця нашых рэгіёнаў. Беларусь мяжуе з нашым усходнім рэгіёнам Латгаліяй – самым бедным у краіне. І гэтае рэгіянальнае пытаньне трэба браць пад увагу.

Ігар Ісаеў, Аляксандар Папко - Варшава