Расейскі самалёт вярнуўся з Вэнэсуэлы

Расейскі самалёт, які вылецеў учора з Каракаса, прызямліўся на маскоўскім лётнішчы Ўнукава.

Незалежныя расейскія СМІ паведамілі, што 28 студзеня з Масквы ў Каракас вылецеў самалёт Boeing 777 без пасажыраў, але з двума экіпажамі на борце. Самалёт прыляцеў у Каракас на наступны дзень.

Рэйс назвалі сакрэтным, бо авіякампанія Nordwind Airlines ніколі ня лётала раней у Вэнэсуэлу. Дадаткова МЗС Расеі раіць сваім грамадзянам устрымацца ад паездак у Вэнэсуэлу, а расейскія турфірмы не прадаюць туры ў гэтую краіну.

Вылет у Каракас супаў з паведамленьнямі заходніх агенцтваў пра зьяўленьне расейскіх наймітаў у Вэнэсуэле.

Прылёт самалёту таксама супаў з абвінавачаньнямі з боку вэнэсуэльскіх парлямэнтарыяў у тым, што рэжым Мадура спрабуе вывесьці ў Маскву 20 тон золата з нацыянальных рэзэрваў, што складае пятую частку ўсіх запасаў.

Апазыцыя заявіла, што менавіта за золатам прыляцеў самалёт з Масквы. Улады Вэнэсуэлы адмаўляюць факт прылёту расейскага самалёту ў Каракас. Прэсавы сакратар расейскага прэзыдэнта Дзьмітры Пяскоў заявіў, што ў Крамлі нічога не вядома пра падобныя пляны.

ПР/юл