Палякі і ўкраінцы атрымалі правакацыйныя эсэмэскі

У Польшчы жыхары гмін, якія знаходзяцца на мяжы з Украінай, атрымалі фальшывыя эсэмэскі ад Урадавага цэнтра бясьпекі. У паведамленьнях гаварылася пра тое, што мужчыны павінны зьявіцца ў прадстаўніцтвы органаў мясцовай улады ў сувязі з надзвычайнай сытуацыяй ва Ўкраіне. Паведамленьні былі адпраўлены амаль у той жа час, калі ва Ўкраіне было прынята рашэньне аб увядзеньні ваеннага становішча. Паліцыя і Агенцтва ўнутранай бясьпекі Польшчы пачалі расьсьледаваць гэту справу.

Мяркуецца, што фальшывыя паведамленьні маглі быць часткай дэзынфармацыйнай стратэгіі. Падобныя падробленыя паведамленьні, адпраўленыя ад імя Міністэрства абароны Ўкраіны, атрымалі жыхары Сумскай вобласьці, якая мяжуе з Расеяй. Мужчын прасілі зьявіцца ў найбліжэйшую вайсковую часьць.

Як сьцьвярджаецца ў паведамленьні ўкраінскага Мінабароны, гэта ня што іншае, як «чарговая праява гібрыднай агрэсіі Расейскай Фэдэрацыі супраць Украіны».

Infosecurity24.pl/вк