Экіпаж ветразёўца «Дар моладзі» адзначыў Дзень незалежнасьці ў Японіі

Экіпаж польскага ветразёўца «Дар моладзі» адсьвяткаваў 100-годзьдзе незалежнасьці Польшчы ў японскім горадзе Асака. У прынагодных мерапрыемствах прынялі ўдзел прадстаўнікі мясцовых японскіх уладаў, польскія дыпляматы, а таксама намесьнік міністра марской гаспадаркі й рачнога флёту Польшчы Анна Москва.

Капітан «Дару моладзі» Рафал Шыманьскі сказаў, што падчас рэйсу каманда распаўсюджвае інфармацыю пра Польшчу й пра яе гісторыю, бо ёю ў замежных краінах не заўсёды валодаюць. Акрамя таго, матросы й афіцэры ветразёўца сустракаюцца з прадстаўнікамі польскай дыяспары на шляху сьледаваньня судна.У Асацы «Дар моладзі» прабудзе да пятніцы, 16 лістапада, затым ён накіруецца ў Сан-Францыска.

Раней польскі карабель прышвартоўваўся ў партах Джакарты, Сынгапура й Ганконга.

Кругасьветнае плаваньне ветразёўца «Дар моладзі», прысьвечанае 100-годзьдзю незалежнасьці Польшчы, пачалося ў Гдыні ў маі бягучага году й завершыцца на радзіме празь 10 месяцаў пасьля выхаду судна з порту прыпіскі.

вс