СБУ выкрыла чарговую здраду ва Ўкраіне

Ва ўпраўленьні Службы бясьпекі Ўкраіны Закарпацкай вобласьці пачалі крымінальную справу ў дачыненьні да старшыні міжнароднага фонду «Адкрыты дыялёг» Людмілы Казлоўскай, паведамляе портал «Стоп карупцыі». СБУ абвінавачвае праваабаронцу ў парушэньні цэлага шэрагу артыкулаў Крымінальнага кодэкса.

У прыватнасьці, Казлоўскую, якая зьяўляецца грамадзянкай Украіны, падазраюць у «дзеяньнях, учыненых з мэтай гвалтоўнай зьмены або зьвяржэньня канстытуцыйнага ладу ці захопу дзяржаўнай улады; наўмысных дзеяньнях, учыненых з мэтай зьмяненьня межаў тэрыторыі або дзяржаўнай мяжы Ўкраіны; дзяржаўнай здрадзе; махлярстве, зьдзейсьненым у буйным памеры». Пра гэта гаворыцца ў дакумэнтах СБУ, апублікаваных парталам.

Людміле Казлоўскай пагражае да 15 гадоў пазбаўленьня волі. На 15 кастрычніка старшыню фонду «Адкрыты дыялёг» выклікалі на допыт.

У сваю чаргу на сайце «Стоп карупцыя» гаворыцца пра тое, што цяпер каманда антыкарупцыянэраў працуе над маштабным расьсьледаваньнем ашуканскіх схем грамадзяніна Казахстана Мухтара Аблязава, у якім фігуруе таксама Людміла Казлоўская.

Паводле дадзеных журналістаў, міжнародная арганізацыя «Адкрыты дыялёг» на чале з Казлоўскай цягам доўгага часу займалася абаронай правоў менавіта Мухтара Аблязава. Апроч таго, «Адкрыты дыялёг» фінансуецца самім Аблязавым, ва Ўкраіне дадзеная арганізацыя працуе як філіял польскага «Адкрытага дыялёгу».

ПР/юл