Зь лістапада ў Польшчы ўводзяцца новыя пашпарты

Грамадзяне Польшчы, якія пасьля 5 лістапада пададуць заявы на атрыманьне пашпарта, стануць уладальнікамі дакумэнта новага ўзору. Пра гэта паведаміў міністар унутраных спраў Польшчы. Новыя дакумэнты павінны быць лепш абаронены і, такім чынам, іх будзе больш складана падрабіць.

На старонках пашпарта зьявяцца графічныя матывы, зьвязаныя са стагодзьдзем аднаўленьня незалежнасьці Польшчы, што адзначаецца сёлета. Некаторыя з выяў былі абраны грамадзянамі падчас інтэрнэт-галасаваньня. Сярод іх — бітва за Варшаву, Магіла Невядомага салдата, Ігнацы Ян Падарэўскі, Юзаф Пілсудскі.

Увядзеньне новага дызайну пашпарта не азначае, што ўладальнікам старых дакумэнтаў трэба будзе замяніць іх на новыя. Яны застануцца сапраўднымі да пазначанай у іх даты.

вк