У Польшчы ў 5 млн вучняў пачаліся канікулы

У Польшчы амаль 5 млн вучняў закончылі навучальны год і пачалі канікулы. Гэта быў першы год функцыянаваньня школ пасьля рэформы сярэдняй адукацыі. Нагадаем, раней у Польшчы існавала трохступенная сярэдняя адукацыя: 6 клясаў пачатковай школы, тры клясы гімназіі й 3 клясы ліцэя. Цяпер у Польшчы – двухступенная сярэдняя адукацыя: 8 гадоў базавай школы й 4 клясы ліцэя.

Польскія дзяржаўныя чыноўнікі наведалі школы з нагоды заканчэньня навучальнага году. Міністар нацыянальнай адукацыі Анна Залеска накіравалася ў павятовы горад Остраў Мазавецкая, які разьмешчаны ў 100 км на ўсход ад Варшавы. Яна пажадала вучням прыемна правесьці канікулы, заклікаўшы адначасова паводзіцца бясьпечна падчас адпачынку.

Прэм’ер-міністар Матэвуш Маравецкі ў сваю чаргу наведаў вучняў у адной са школ гарадка Зомбкі, які разьмешчаны ля самых межаў Варшавы. Ён падзякаваў настаўнікам за працу, а вучням пажадаў адпачыць і з новымі сіламі вярнуцца на вучобу 1 верасьня.

Канікулы ў Польшчы працягнуцца больш за 70 дзён.

вс