Журы абрала тры эскізныя праекты мэмарыяла ў Курапатах

Журы абрала тры эскізныя праекты памятнага знака (мэмарыяла) у Курапатах. Пра гэта журналістам паведаміў рэктар Беларускай дзяржаўнай акадэміі мастацтваў Міхаіл Баразна, перадае дзяржаўнае агенцтва БЕЛТА.

У конкурсе ўдзельнічала 32 праекты. Журы 21 траўня 2018 году вызначыла тры, якія адрозьніваюцца найбольшай арыгінальнасьцю й мастацкай выразнасьцю, праінфармаваў Міхаіл Баразна. Ён дадаў, што варыянты маюць патрэбу ў дапрацоўцы, у прыватнасьці, з улікам архітэктурнай прывязкі, пэрспэктыў добраўпарадкаваньня й гэтак далей.

Трэба будзе таксама вызначыць дакладнае месца разьмяшчэньня памятнага знака, каб ён арганічна ўпісваўся ў існуючы народны мэмарыял і ніякім чынам не парушаў яго цэласнасьці й супадаў з ляндшафтам.

Дапрацаваныя эскізы павінны быць прадстаўлены журы да 1 ліпеня.

belta.by/аз