За фальсыфікацыю прабегу аўтамабіля ў турму можа патрапіць уладальнік

Пакараньню будзе падвяргацца ня толькі той, хто адкручвае аўтамабільны лічыльнік, але таксама ўладальнік аўтамабіля з несапраўдным прабегам.

Паводле экспэртаў, нават 80 працэнтаў аўто, якія завозяцца ў Польшчу з-за мяжы, могуць мець адкручаны лічыльнік.

Міністэрства юстыцыі хоча процідзейнічаць гэтай зьяве. Па гэтай прычыне ведамства падрыхтавала праект паправак у Крымінальны кодэкс, які ўводзіць пакараньні за фальсыфікацыю прабегу.

Згодна з законапраектам, за адкручваньне лічыльніка будзе пагражаць ад трох месяцаў да пяці гадоў пазбаўленьня волі – як для заказчыка махлярства, так і для таго, хто гэта зробіць. Будзе пакараны ня толькі мэханік, але і ўладальнік машыны.

Такое ж пакараньне – ад трох месяцаў да пяці гадоў пазбаўленьня волі будзе таксама пагражаць, калі ўладальнік аўтамабіля не паведаміць на станцыі тэхпрагляду аб тым, што ён паставіў новы лічыльнік, напрыклад, у сувязі з сапраўднай, ці надуманай, аварыяй.

яс