Мінулы тыдзень – самы крывавы ў Сірыі за апошнія 2 гады

230 мірных жыхароў загінулі ў Сірыі ў выніку авіяналётаў, зьдзейсьненых на мінулым тыдні авіяцыяй Башара Асада й Расеі. Гэта самыя кровапралітныя бамбардаваньні за апошні час, і іх можна прызнаць ваеннымі злачынствамі – заявіў у суботу Вярхоўны камісар ААН па правах чалавека Зэйд Раад Аль-Хусэйн. Прадстаўнік ААН таксама падкрэсьліў, што ёсьць зьвесткі пра прымяненьне расейскай і сірыйскай урадавай авіяцыяй «таксычных сродкаў».

Паводле Сірыйскай абсэрваторыі правоў чалавека, мінулы тыдзень у ахопленай вайной дзяржаве быў самым крывавым з 2015 году. Сілы Асада атакавалі паўднёва-заходнія рэгіёны краіны, якія кантралююцца Свабоднай сірыйскай арміяй.

У аўторак міжнародная камісія ААН пачала сьледзтва па справе прымяненьня сірыйскімі ўрадавымі войскамі атрутных газаў. У заяве, апублікаванай у Жэнэве гаворыцца, што «бомбы, якія, хутчэй за ўсё, утрымліваюць хлёр, былі выкарыстаныя ў гарадах Саракіб і Дама ў сірыйскай правінцыі Ўсходняя Гута».

PAP/ап