Польскі Сэйм стварыў новую парлямэнцкую камісію

Па ініцыятыве партыі «Права й справядлівасьць» створана парлямэнцкая камісія па ацэнцы сумы кампэнсацыі, што павінна Нямеччына Польшчы за шкоды, прычыненыя падчас Другой сусьветнай вайны.

У польскім парлямэнце пачынаюцца працы па аналізе ды выпрацоўцы прававых шляхоў рэалізацыі гэтых патрабаваньняў, – заявіў дэпутат Аркадыюш Муларчык, які зьяўляецца старшынём камісіі. Парлямэнтары таксама будуць зьбіраць усю дакумэнтацыю па дадзенай справе.

Першае паседжаньне камісіі адбудзецца падчас бліжэйшай сэсіі Сэйма, якая заплянавана на 10-13 кастрычніка.

Камісія мае адкрыты характар. Як пазначана ў рэглямэнце, у яе склад уваходзяць дэпутаты й сэнатары, якія прадстаўляюць «непалітычную групу зацікаўленую вызначэньнем абʼектыўнай ацэнкі сумы страт, панесеных Польшчай у выніку германскіх дзеяньняў падчас Другой сусьветнай вайны.» Аднак пакуль у склад камісіі ўвайшлі толькі дэпутаты кіроўнай партыі ПіС, апазыцыя паставілася адмоўна да новай ініцыятывы.

Стварэньне камісіі – гэта наступства ліпенскіх заяў кіраўніка партыі ПіС Яраслава Качыньскага. Палітык выказаў меркаваньне, што Польшча ніколі не атрымала кампэнсацыю за вялізарныя ваенныя страты, якія краіна адчувае па сёньняшні дзень.

У сваю чаргу нямецкі Бундэстаг заявіў, абапіраючыся на вынікі працы экспэртнай групы навукоўцаў, што польскія прэтэнзіі неабгрунтаваныя.

ПР/юл