Віцэ-старшыня Эўракамісіі знэрваваў «Салідарнасьць» сваім выказваньнем

У Варшаве прайшоў пратэст прафсаюзу «Салідарнасьць» каля прадстаўніцтва Эўракамісіі. Прафсаюз выступае супраць «умяшаньня Эўракамісіі ў пытаньне зьніжэньня пэнсійнага ўзросту ў Польшчы».

Гаворка ідзе, у прыватнасьці, пра выказваньне віцэ-старшыні Эўракамісіі Франса Цімэрманса, які назваў дыскрымінацыяй той факт, што жанчыны й мужчыны ў Польшчы ідуць на пэнсію ў розным узросьце.

Прэс-сакратар «Салідарнасьці» Марэк Левандоўскі лічыць пазыцыю Эўракамісіі ўмяшаньнем ва ўнутраныя справы Польшчы й падкрэсьлівае, што розны пэнсійны ўзрост – гэта не дыскрымінацыя жанчын, а прывілей для іх.

Рэформа пэнсійнага ўзросту ў Польшчы ўваходзіць у жыцьцё 1 кастрычніка. Рэформа прадугледжвае, што пэнсійны ўзрост для мужчын складае 65 гадоў, а для жанчын – 60. Адзначым, што раней, з 2012 года, дзейнічаў закон аб паступовым павышэньні пэнсійнага ўзросту да 67 гадоў незалежна ад полу.

вс