У Менску пройдзе выстава прац жанчын, якія перажылі хатні гвалт

У Менску ў лістападзе пройдзе выстава творчых працаў жанчын, якія перажылі хатні гвалт. Гэтая выстава стане вынікам курсу “Адкрытая жыць”. Курс арт-тэрапіі для жанчын, пацярпелых ад гвалту ў сям’і, арганізаваны Фондам ААН у галіне народанасельніцтва (ЮНФПА).

Майстар-клясы праводзіць вядомая мастачка Ніка Сандрас. У чэрвені яна наведала шэлтэр грамадзкага аб’яднаньня “Радзіслава”, паразмаўляла зь яго кліенткамі й вырашыла ня толькі навучыць іх маляваць, але й праз малюнак распавядаць свае жыцьцёвыя гісторыі.

Мастачка правядзе два курсы: “10 натхненьняў прыроды” й “Батанічная ілюстрацыя”. Увесь курс уключае ў сябе 14 заняткаў па арт-тэрапіі й маляваньні, якія даюць удзельніцам магчымасьць вярнуць упэўненасьць у сабе, раскрыць таленты, адчуць сябе ў бясьпецы.

На сёньня ў шэлтэры “Радзіславы” жыве 26 жанчын, якім аказваюць сацыяльна-псыхалягічную падтрымку ды іншыя паслугі па выхадзе з крызыснай сытуацыі.

белта/эўрарадыё/вс