У Туркмэністане дэмантавалі пазалочаны помнік Туркмэнбашы

У Туркмэністане дэмантавалі пазалочаны помнік першаму прэзыдэнту краіны Сапармурату Ніязаву (Туркмэнбашы).

Помнік разьмяшчаўся ў Ашхабадзе на праспэкце Махтумкулі, які праходзіць па цэнтры сталіцы перад будынкам МУС краіны. Скульптура адлюстроўвала Туркмэнбашы, які сядзіць у крэсьле ў генэральскім мундзіры.

Тэрыторыя вакол будынку МУС і помніка больш за месяц таму была абгароджаная будаўнічым плотам у сувязі з рэканструкцыяй тратуараў. Калі пасьля заканчэньня рэканструкцыі плот прыбралі, помніка перад будынкам МУС не аказалася.

Гэта ўжо ня першы дэмантаваны помнік Туркмэнбашы ў Ашхабадзе. Раней, у 2011 годзе з цэнтральнай часткі горада была перанесеная на яго ўскраіну знакамітая пазалочаная статуя Сапармурата Ніязава, якая круцілася ўсьлед за сонцам.

Сапармурат Ніязаў быў першым прэзыдэнтам Туркмэністана з моманту атрыманьня незалежнасьці. Ён займаў пасаду з 1990 года па сьнежань 2006 года, ажно да сваёй сьмерці. З 1999 года Туркмэнбашы атрымаў афіцыйны тытул - пажыцьцёвы прэзыдэнт.

інтэрфакс/вс