У каталікоў - Папялец

Сёньня каталікі адзначаюць Папялец, які пачынае Вялікі пост у традыцыйным хрысьціянстве. Пачынаючы з Папяльца на працягу сарака дзён вернікі рыхтуюцца да Вялікадня.

Час Вялікага посту – гэта час пакаяньня, які павінен дапамагчы глыбей задумацца над жыцьцём і асноўнымі каштоўнасьцямі. Гэта асаблівы час падрыхтоўкі да найважнейшых для хрысьціян сьвятаў уваскрасеньня Хрыста, то бок падзеі, якая зьяўляюцца асновай Касьцёла й хрысьціянскай веры.

У Папялец каталікі традыцыйна прымаюць удзел у імшы, падчас якой сьвятар пасыпае іх галовы попелам, выказваючы словы: „Прах да праху й пыл да пылу!” або „Пакайцеся й верце ў Эвангельле!”.

Попел сымбалізуе нетрываласьць чалавечага жыцьця й пакору.

У Папялец каталікоў абавязвае строгі пост. Гэта азначае, што яны павінны адмовіцца ад мяса, могуць зьесьці толькі тры стравы ў дзень, у тым ліку адну сытную.

Вялікі пост заканчваецца ў Вялікі чацьвер, 13 красавіка. З гэтая дня каталікі пачынаюць адзначаць велікодны Трыдуум, які працягнецца да суботы, 15 красавіка. Наступны дзень - гэта ўжо Велікодная нядзеля.

аз