Справу пʼянага кіраўніка ДАІ, які на аўто зьбіў жанчыну, перадалі ў суд (ФОТА)

Справу былога часовага выканаўцы абавязкаў ДАІ Баранавіцкага раёну Андрэя Ваўкавыцкага перадалі ў суд. Пра гэта паведаміла памочнік старшыні Берасьцейскага абласнога суду Марына Скалковіч. Разглядаць яе будзе суд Ляхавіцкага раёну, але дата судовага працэсу пакуль не прызначаная.

Экс-даішніка вінавацяць у парушэньні правілаў дарожнага руху асобай, якая кіравала транспартным сродкам у стане алькагольнага апʼяненьня, што пацягнула па неасьцярожнасьці сьмерць чалавека.

ДТЗ, якое прывяло супрацоўніка ДАІ на лаву падсудных, адбылося 26 лістапада 2016 года. Кіраўнік Баранавіцкай ДАІ ехаў пʼяным на ўласным аўто – ня ў форме і ў вольны час. На трасе каля вёскі Дарава ў Ляхавіцкім раёне ён зьбіў 36-гадовую жанчыну. Маці дваіх дзяцей загінула на месцы.

Пасьля аварыі кіроўцу затрымалі й зьмясьцілі ў ізалятар часовага ўтрыманьня. Ён аказаўся моцна п'яны: праведзены агляд паказаў, што ў яго крыві ўтрымліваецца амаль 3 праміле алькаголю. 29 лістапада яго ўзялі пад варту. Міністар унутраных спраў Ігар Шуневіч вельмі рэзка выказаўся пра гэты выпадак і паведаміў, што супрацоўнікі ДАІ праходзяць праверку на паліграфе.

Як выявіла сьледзтва, праведзенае ўпраўленьнем Сьледчага камітэту па Берасьцейскай вобласьці, у момант ДТЗ жанчына ішла па пешаходным пераходзе. Аўтамабіль рухаўся з хуткасьцю, большай за 60 км/гадз.

белапан/эўрарадыё/вс

Андрэй Ваўкавыцкі, фота: адкрытыя крыніцы