90-гадовы паляк патрабуе грошай за каня, канфіскаванага ў вайну

90-гадовы Ян Кулеша патрабуе, каб польская дзяржава заплаціла за каня, канфіскаванага на ваенныя патрэбы ў 1939 годзе.

Пасьля нападу гітлераўскай Нямеччыны на Польшчу ў 1939 годзе Ян Кулеша са сваім бацькам паехалі ў павет у ваенны камісарыят, бо выйшаў загад паставіць войску коней. Яны аддалі ваенным свайго каня, а ўзамен атрымалі расьпіску. На той момант конь выцэньваўся на 700 даваенных польскіх злотых.

Пра тое, што дзяржава яму вінаватая грошы за каня, спадар Ян прыпомніў толькі цяпер. І падаў дакумэнты ў дзяржорган з патрабаваньнем выплаціць яму 28 тыс. актуальных злотых (больш за 6 тыс. 300 эўра), бо на такую суму ён аблічыў вартасьць даваенных 700 злотых. Дзяржава адмовілася плаціць па расьпісцы, спасылаючыся на тое, што пытаньне пратэрмінавалася.

Ян Кулеша, доўга ня думаючы, падаў справу ў суд. Неўзабаве яна трапіць на разгляд Беластоцкага адміністрацыйнага суду.

вс