Прэзыдэнт Франсуа Алянд ня пойдзе на перавыбар

Прэзыдэнт Францыі Франсуа Алянд заявіў, што ня пойдзе на перавыбар на пасаду кіраўніка дзяржавы. Алянд займае найвышэйшую пасаду ў Францыі з 2012 году.

Пра сваё рашэньне прэзыдэнт паведаміў у тэлевізійным выступленьні. Прэзыдэнцкія выбары ў Францыі адбудуцца вясной 2017 году. На папярэдніх выбарах у 2012 годзе Аланд балятаваўся ад імя сацыялістаў і перамог рэспубліканца Нікаля Сарказі.

Паводле апошніх апытаньняў, Франсуа Алянд не карыстаецца папулярнасьцю. У пачатку лістапада, газэта „Le Figaro” апублікавала апытаньне, у якім цяперашні прэзыдэнт Францыі меў самыя нізкія рэйтынгі ў гісторыі – яго падрымлівала толькі 11% рэспандэнтаў.

У сваю чаргу паводле дадзеных апытаньня, праведзенага па замове тэлебачаньняў RTL, LCI і штодзёнкі „Le Figaro”, найбольшы шанец на перамогу ў прэзыдэнцкіх выбарах мае Франсуа Фіён, кандыдат правацэнтрыстаў. У першым туры галасаваньня ён можа атрымаць 28-31% галасоў.

Марын Ле Пен, кандыдатка ад ультраправага Нацыянальнага фронту на прэзыдэнцкіх выбарах можа разьлічваць на 23-25% галасоў выбаршчыкаў.

На Алянда намерваліся галасаваць толькі 7,5-14% францускіх рэспандэнтаў.

аз