Сёньня грамадзяне ЗША выбіраюць прэзыдэнта краіны

Сёньня, 8 лістапада, грамадзяне Злучаных Штатаў Амэрыкі выбіраюць прэзыдэнта краіны. Акрамя таго, амэрыканцы ў галасаваньні вызначаць членаў Палаты прадстаўнікоў і трэцюю частку Сэната Кангрэса краіны.

Асноўнымі прэтэндэнтамі на пасаду прэзыдэнта зьяўляюцца кандыдатка Дэмакратычнай партыі Хілары Клінтан і Рэспубліканскай партыі Дональд Трамп.

Акрамя іх, удзел у 58-х прэзыдэнцкіх выбарах у якасьці кандыдатаў прымаюць прадстаўнік Лібэртарыянскай партыі Гэры Джонсан, Партыі зялёных Джыл Стэйн, Канстытуцыйнай партыі Дарэл Касл і беспартыйны кандыдат Эван Макмалін.

Паводле апытаньняў грамадзкай думкі, перавагу над Трампам мае Клінтан, але ўсяго ў некалькі працэнтаў галасоў.

У ЗША існуе інстытут датэрміновага галасаваньня. Паводле СМІ, больш за 45 млн грамадзян прагаласавалі ў датэрміновым парадку. Прагнозы не выключаюць, што датэрмінова могуць прагаласаваць больш за 50 млн выбаршчыкаў, што дало б каля 40% грамадзян, якія маюць права голасу.

Прозьвішча новага 45-га прэзыдэнта ЗША стане вядома раніцай у сераду, 9-га лістапада.

вс