IPC расьсьледуе інцыдэнт на адкрыцьці Паралімпіяды

Міжнародны паралімпійскі камітэт (International Paralympic Committee, IPC) пачаў расьсьледаваньне інцыдэнту на адкрыцьці Паралімпіяды ў Рыё-дэ-Жанэйра, падчас якога беларуская дэлегацыя выйшла з расейскім сьцягам.

Расейскі сьцяг на парадзе зборных нёс адзін з удзельнікаў беларускай дэлегацыі. Мужчына здолеў прайсьці чвэрць стадыёна, перш чым у яго адабралі сьцяг.

Раней кіраўнік Беларускага паралімпійскага камітэта Алег Шэпель назваў адхіленьне расейскай зборнай ад спаборніцтваў у Рыё самым няправільным крокам за ўсю гісторыю паралімпійскага руху. Ён паабяцаў, што дэлегацыя Беларусі акрамя нацыянальнага сьцяга мае намер несьці й расейскі. Міжнародны паралімпійскі камітэт прыгразіў атлетам, якія зьбіраліся пранесьці сьцяг Расеі, „пэўнымі мерамі”. У адказ Шэпель паправіўся, што беларуская зборная будзе несьці толькі сьцяг сваёй краіны, а расейскі трыкалёр паабяцаў узяць з сабой на трыбуну.

Журналіст „Press Association” паведаміў, што Міжнародны паралімпійскі камітэт ужо высьветліў асобу парушальніка, аднак пакуль невядома, якія санкцыі пагражаюць спартсмэну.

Міжнародны паралімпійскі камітэт адхіліў расейскіх спартоўцаў ад Гульняў 7 жніўня. Прычынай дыскваліфікацыі сталі высновы незалежнай камісіі Сусьветнага антыдопінгавага агенцтва, якое абвінаваціла Расею ў „дзяржаўнай допінг-сыстэме”, у якую нібыта ўваходзілі й паралімпійцы.

РИА Новости/belapan.com/аз