На Грабарцы пачынаецца сьвята Праабражэньня Гасподняга

На Сьвятую гару Грабарку прыбываюць паломнікі з усяе Польшчы. Сёньня там пачынаюцца двухдзённыя ўрачыстасьці з нагоды сьвята Праабражэньня Гасподняга.

Гара Грабарка – гэта самае сьвятое месца для праваслаўных у Польшчы. Кожны год на сьвята Праабражэньня Гасподняга (у народнай традыцыі „Спас”), прыбываюць тысячы праваслаўных вернікаў з Польшчы й замежжа.

Паводле легенды, на пачатку XVIII стагодзьдзя на гары знайшла прытулак група жыхароў блізьляжачых Сямяцічаў (Siemiatycze), якія ўцякалі ад эпідэміі. У падзяку за выратаваньне ад хваробы, яны паставілі на гары драўляны крыж.

У цяперашні час царква Праабражэньня Гасподняга акружана тысячамі крыжоў, якія прыносяць з сабой вернікі. Сьвяточную ўсяночную будзе служыць Мітрапаліт Варшаўскі і ўсяе Польшчы Сава разам з Патрыярхам Антыяхійскім і ўсяго Ўсходу Янам X.

аз