Польшча прадала Беларусі сем цягнікоў

Кампанія "АСБ Лізінг" прыцягнула крэдыт у 19 млн. еўра ад "Райфайзен Банк Польска С.А." (Raiffeisen Bank Polska S.A) для фінансаваньня паставак дызель-цягнікоў.

Як паведамляе "АСБ Лізінг", крэдытнае пагадненьне было падпісанае ў Варшаве 15 лютага. Пазыковыя сродкі выдзеліў "Райфайзен Банк Польска С.А." у межах фінансаваньня паставак у 2016 годзе чатырох дызель-цягнікоў вытворчасьці польскай кампаніі Pojazdy Szynowe PESA Bydgoszcz S.A. з мэтай далейшай перадачы ў фінансавы лізінг Беларускай чыгунцы. Гарантыі па забесьпячэньні абавязацельстваў "АСБ Лізінга" ў межах зьдзелкі дадзеныя матчыным банкам — ААТ "АСБ Беларусбанк".

"Рэалізацыя лізінгавага праекта дасьць магчымасьць павысіць якасьць і бясьпеку транспартнага абслугоўваньня пасажыраў чыгуначнага транспарту ДА "Беларуская чыгунка" ў рэспубліцы і за яе межамі", — гаворыцца ў паведамленьні.

ТАА "АСБ Лізінг" — унівэрсальная лізінгавая кампанія, якая аказвае паслугі фінансавага лізінгу, міжнароднага лізінгу і лізінгу для фізычных асоб. Яна ажыцьцяўляе дзейнасьць з 2004 года.

У мінулым годзе польская фірма PESA прадала Беларусі тры цягнікі. Яны працуюць на трасе Менск-Вільня. Цягнікі маюць кожны 145 сядзячых месцаў і могуць дасягнуць хуткасьць 140 км/г.

БелаПАН/яс