Польшча заклікала перавозчыкаў пакінуць тэрыторыю РФ

Расейскі бок станоўча адказаў на зварот польскага віцэ-міністра інфраструктуры й будаўніцтва Ежы Шміта, паведаміла польскае ведамства на сваёй інтэрнэт-старонцы.

Гаворка ідзе пра заклік правесьці перамовы, датычныя правілаў узаемных аўтамабільных перавозак і квотаў дазволаў на 2016 год.

На бліжэйшы панядзелак, то бок 1 лютага, заплянаваныя перамовы ў рамках паседжаньня польска-расейскай камісіі па справах міжнароднага аўтамабільнага транспарту.

Сустрэча пройдзе ў Варшаве ў сядзібе Міністэрства інфраструктуры й будаўніцтва. Як паведамляецца на сайце ведамства, станоўчы вынік гэтых перамоваў дазволіць правесьці перамовы віцэ-міністру Ежы Шміту зь яго расейскім калегам. Сустрэча ўступна заплянаваная на аўторак, 2 лютага.

Калі пагадненьне ня будзе дасягнутае, то на наступным тыдні спыняцца аўтамабільныя перавозкі паміж Польшчай і Расеяй.

Польскі бок ня хоча пагадзіцца на расейскую прапанову аб прадаўжэньні да 15 лютага леташняга дазволу, тэрмін дзейнасьці якога мінае 1 лютага.

Палякі тлумачаць, што расейская прапанова ня толькі не вырашае праблему, але пагражае тым, што польскія фуры ня змогуць вярнуцца ў Польшчу.

Ведамства заклікала польскіх перавозчыкаў хутка вяртацца ў краіну, а расейскі бок – не перашкаджаць ім у гэтым.

Адначасова Міністэрства інфраструктуры й будаўніцтва паведаміла, што выдадзена 10 тысяч дазволаў на перавозкі ў Беларусь, таму няма небясьпекі поўнай блякады мяжы.

З 1 лютага ні польскія грузавікі ня змогуць уехаць у Расею, ні расейскія ў Польшчу.

аз