Продаж зямлі іншаземцам – не пагроза

Продаж польскай зямлі замежнікам не такая вялікая пагроза, як пераконваюць фэрмэры, лічыць міністар сельскай гаспадаркі Марэк Савіцкі.

Паводле кіраўніка сельскагаспадарчага ведамства, цягам апошніх 10 гадоў са згоды міністэрства іншаземцы набывалі ў Польшчы ня больш чым 1200 га зямлі ў год.

„Гэта ня нейкі вялізны маштаб”, - кажа Марэк Савіцкі. Аднак ён дадаў, што ў Сэйм былі ўнесеныя два законапраекты, аўтарства кааліцыйнай „Польскай сялянскай партыі” й апазыцыйнага „Права й справядлівасьці”, якія бяруць пад увагу забарону на продаж польскай зямлі іншаземцам.

Такім чынам міністар сяльскай гаспадаркі пракамэнтараваў абвінавачваньні фэрмэраў, якія пратэставалі ля будынку Канцылярыі прэм'ер-міністра.

Паводле пратэстоўцаў, польская зямля масава прадаецца замежнікам. Таму яны патрабуюць ажыцьцяўленьня правілаў, якія зьменяць гэтую сытуацыю.

аз