Палове беларусаў паленьне асабліва небясьпечнае

Згодна з дасьледаваньнямі беларускага Інстытуту генэтыкі і цыталёгіі, 48% беларусаў маюць генэтычную мутацыю, што пагражае курыльшчыкам анкалягічнымі і іншымі захворваньнямі, піша СБ.

У людзей з гэтай мутацыяй перастае працаваць ген глутатыянтрансфэраза, які ператварае шкодныя рэчывы, што ўтвараюцца пры паленьні, у зручныя для вывядзеньня формы. Такім чынам, небясьпечныя рэчывы назапашваюцца ў арганізьме і могуць стаць стымулятарамі разнастайных хвароб, у тым ліку анкалягічных.

Навука яшчэ не знайшла спосаб выправіць гэткую генэтычную мутацыю.

Дасьледаваньні беларускіх навукоўцаў паказалі, што такую мутацыю маюць 48% беларусаў, а сярод пацыентаў Менскага анкалагічнага дыспансеру з дыягназам «рак лёгкага» такая мутацыя знайшлася практычна ў кожнага.

яс/СБ/nn.by