Дзень польскага сьцяга

Дзень польскага сьцяга, які адзначаецца 2 траўня, -- гэта адно з наймаладзейшых дзяржаўных сьвятаў у Польшчы, аб'яўленае ў выніку паправак у закон у 2004 годзе.

Сьвята мае адукацыйны характар і служыць прамоцыі польскіх нацыянальных сымбаляў. Першыя сьвяткаваньні адбыліся ў 2005 годзе й пачаліся ўрачыстым падняцьцём бела-чырвонага сьцяга на Каралеўскім замку.

Польскі сьцяг уяўляе собаю дзьве аднолькавыя гарызантальныя палосы белага й чырвонага колеру. Упершыню ў якасьці дзяржаўных яны былі выкарыстаныя ў 1831 годзе. Сьцяг у такім выглядзе быў афіцыйна прызнаны нацыянальным сымбалем у 1919 г., год пасьля атрыманьня Польшчаю незалежнасьці.

Згодна з законам, кожны можа легальна вывешваць нацыянальны сьцяг ня толькі з нагоды дзяржаўных сьвятаў, але таксама з нагоды ўрачыстасьцяў і падзеяў прыватнага жыцьця. Адзіная ўмова – сьцяг павінен вывешвацца з пашанай і павагай.

эб