Крэмль „трасе” Газпром

Чакаюцца „цікавыя вынікі”.

Расейскія чыноўнікі правераць фінансы Газпрому. Гэта першая за апошнія пяць гадоў сур’ёзная праверка адной з найбуйнейшых кампаній у паліўным сэктары.

Правядзеньне праверкі даручанае расейскай Кантрольнай палаце. «Вынікі, несумненна, будуць цікавыя", - сказаў кіраўнік палаты Сяргей Сьцяпашын. Ён жа падкрэсліў, што, нягледзячы на шматлікія заявы пра непразрыстасьць Газпрому, на пачатковай стадыі кантролю супрацоўнікі кампаніі ідуць на супрацу з прадстаўнікамі фінансавага кантролю.

Вось ужо шмат гадоў Газпром займае адно зь першых месцаў у сусьветным сьпісе вядучых паліўных кампаній. Гадавы даход расейскага гіганта ацэньваецца ў 40 мільярдаў даляраў. На думку некаторых рынкавых аналітыкаў, Газпром не ўтрымаў бы такой пазыцыі без падтрымкі дзяржавы. Яны дадаюць, што гэты калос на гліняных нагах, які патрэбуе рэструктурызацыі.

юл